O`zbekiston fuqaroligidan chiqish

O‘zbekiston Respublikasi fuqaroligidan chiqishni rasmiylashtirish uchun arizachi Bosh konsulxonaga ikki nusxada (alohida jildlarda) quyidagi hujjatlar to‘plamini shaxsan taqdim etishi lozim:

  • O‘zbekiston Respublikasi Prezidenti nomiga O‘zbekiston Respublikasi fuqaroligidan chiqish to‘g‘risidagi ariza. Ariza (namuna) chiqish asoslarini bayon qilgan holda bir rangdagi siyohli yoki sharikli ruchkada qo`lda o`zbek tilida yoziladi. Arizaning barcha nusxalari ariza beruvchi tomonidan imzolangan, to`ldirish sanasi ko`rsatilgan hamda konsul tomonidan tasdiqlangan bo`lishi lozim. Unda hech qanday o`chirishlar va tuzatishlar bo`lmasligi lozim;
  • 18 yoshga yetmagan shaxsning O`zbekiston Respublikasi fuqaroligidan chiqish to`g`risidagi arizasi uning ota-onasi tomonidan bolaning tug`ilganligi to`g`risidagi guvohnomasi yoki pasporti nusxasi bilan birgalikda beriladi. Ushbu masala ariza-anketaning tegishli katagida aks ettiriladi;
  • 14 dan 18 yoshgacha bo`lgan voyaga yetmagan shaxslar ota-onaning arizasiga O`zbekiston Respublikasi fuqaroligidan chiqishga konsul tomonidan tasdiqlangan o`z roziligini ilova qilishi lozim. Bunda barcha nusxalar to`ldirish sanasi ko`rsatilgan holda imzolangan, hamda konsul tomonidan tasdiqlangan bo`lishi lozim. Ularda hech qanday o`chirishlar va tuzatishlar bo`lmasligi lozim;
  • Agar ota-onaning ikkalasi ham O`zbekiston Respublikasi fuqarosi bo`lsa va ularning biri bir vaqtning o`zida voyaga yetmagan farzandning O`zbekiston Respublikasi fuqaroligidan chiqishi to`g`risida iltimosnoma kiritib, O`zbekiston Respublikasi fuqaroligidan chiqayotgan bo`lsa, bunda ikkinchisining konsul tomonidan tasdiqlangan yoki notarial tasdiqlangan yozma arizasi taqdim qilinadi, unda bolaning O`zbekiston Respublikasi fuqaroligidan chiqishiga munosabati aks ettirilishi lozim;
  • Ota-onalar farzandlarining (har qanday yoshdagi barcha fuqarolar uchun amal qiladi, ota-onalar farzandlari bilan birgalikda fuqarolikdan chiqish uchun hujjatlarni taqdim etgan hollar bundan mustasno) fuqarolikdan chiqishiga qarshi emasligi va kelajakda ularga hech qanday moddiy da’vo qolmasligi haqida notarial tasdiqlangan rozili hati.
    quyidagi hollarda:
    – agar ota-ona vafot etgan bo’lsa, o’lim to’g’risidagi guvohnomani (asl va nusxa) taqdim etishingiz lozim;
    – agar ota-onadan biri bolani yolg’iz tarbiyalagan bo’lsa, tasdiqlovchi hujjat (asl va nusxa) taqdim etilishingiz lozim;
    – agar ota-onalar ajrashgan bo’lsa, tasdiqlovchi hujjatni (asl va nusxa) taqdim etilishingiz lozim.
  • Taqdim qilinayotgan hujjatlarning (milliy pasport (hamma varoqlari), tug`ilganlik haqida, ota yoki onaning yohud turmush o`rtog`ining birining o`limi haqida, farzandlikka olish haqida guvohnomalar, ota-onalik huquqidan mahrum qilish, alimentlar to`lash to`g`risidagi qarorlar, mehnat daftarchasi) nusxalari asl nusxalari bilan taqqoslanadi va konsul tomonidan tasdiqlanadi;
  • Avtobiografiya (namuna) ariza (o`zbek tilida) beruvchi tomonidan o`chirishlar, o`zgartirishlar va chizilishlarsiz kompyuterda yozilishi lozim. Ariza beruvchining maktabda o`qishi paytidan boshlab hozirgi kungacha bo`lgan barcha biografik ma’lumotlari xronologik tartibda bayon qilinadi. Avtobiografiyaning barcha nusxalari to`ldirish sanasi ko`rsatilgan holda ariza beruvchi tomonidan imzolangan hamda konsul tomonidan tasdiqlangan bo`lishi lozim;
  • Ariza beruvchini belgilovchi ma’lumotlari so`rovnomada, 35 mm x 45 mm o`lchamdagi 4 ta fotosurat ilova qilgan holda o`zbek tilida (lotin harflarida) bayon etiladi. Bunda anketaning barcha bandlari toza ravishda, o`chirishlar, o`zgartirishlar va chizilishlarsiz to`ldirilishi lozim. Anketaning barcha nusxalari to`ldirish sanasi ko`rsatilgan holda ariza beruvchi tomonidan imzolangan, hamda konsul tomonidan tasdiqlangan bo`lishi lozim;
  • Fuqaroning mazkur davlatda qonuniy yashashi uchun berilgan kartochkasi yoki boshqa hujjati nusxasi (Aufenthaltstitel, Niederlassungserlaubnis);
  • 137 evro konsullik boji to’lovi kvitansiyasi (Bosh konsulxonada EC-karta yordamida to’lash imkoniyati bor);
  • Turmush o’rtog’i pasporti nusxasi va agarda u O’zbekiston fuqarosi bo’lsa yozma roziligi (notarial tasdiqlangan).

* O‘zbekiston Respublikasi fuqaroligidan chiqishni rasmiylashtirish uchun hujjatlarni taqdim etuvchi shaxs Bosh konsulxonada doimiy konsullik ro’yxatida turgan bo’lishi kerak!

**Barcha chet tillaridagi hujjatlar o’zbek tiliga rasmiy tarjima qilingan bo’lishi lozim!

*** Ilova qilinayotgan barcha hujjatlar nushasini tasdiqlash maqsadida ularning asl nushasini taqdim etish shart!

MUHIM!

– Agar ariza beruvchi va uning oila a’zolari (turmush o’rtog’i va bolalari) Germaniya fuqarolari bo’lsa yoki chet el fuqaroligini berish kafolatiga ega bo’lsa, bunday hollarda ushbu hujjatlarning nusxalarini (Einbürgerungzusicherung, Einbürgerungsurkunde yoki Kopie des Ausweises), o’zbek tiliga tarjimasi bilan taqdim etish talab etiladi.
– O’zbekiston Respublikasi Prezidentining 2021 yil 10 martdagi “O’zbekiston Respublikasi fuqaroligiga oid masalalarni ko’rib chiqishning yangilangan tartibini belgilash to’g’risida”gi PF-6185-sonli Farmonning 9-bandiga muvofiq, ariza beruvchi tomonidan taqdim etiladigan O’zbekiston Respublikasi davlat tilida bo’lmagan hujjatlar arizachi tomonidan o’zbek tiliga tarjima qilinadi.
– Murojaat etuvchidan barcha hujjatlar kelib tushgan va ularni Bosh konsulxonada tekshirgan paytdan boshlab iltimosnoma ijro uchun qabul qilingan hisoblanadi.
– Agar arizachi manzilini yoki telefon raqamini o’zgartirsa, bu haqda Bosh konsulxonaga yozma ravishda xabar berishi so’raladi. Ariza beruvchining haqiqiy manzili va telefon raqami bo’lmasa, Bosh konsulxona O’zbekiston Respublikasi fuqaroligidan chiqish to’g’risidagi hujjatlarni ko’rib chiqish natijalari to’g’risida o’z vaqtida xabar berishga kafolat bermaydi.

O‘zbekiston Respublikasi fuqaroligidan chiqqan fuqarolarning ro‘yxati

Hurmatli fuqarolar!

Agar Oʻzbekiston Respublikasi fuqaroligidan chiqqanlar roʻyxatida oʻz F.I.Sh. topsangiz, ma`lumotnoma olish uchun elektron navbat olib Bosh konsulxonaga qabulga kelishingiz mumkin.

Ma`lumotnoma olish uchun Siz quyidagilarni taqdim etishingiz lozim:
– O‘zbekiston Respublikasi pasporti;
– Qabul paytida konsullik yig‘imlarini to‘lash – 42 evro.

Shuningdek, Siz ma`lumotnomani pochta orqali olishingiz mumkin va Bosh konsulxonaga quyidagilarni yuborishingiz lozim:
– O‘zbekiston Respublikasi pasporti;
– To’lov kvitansiyasining nusxasi – 40 evro;
– Qaytish manzili ko’rsatilgan markali konvert.

Bank hisobi Bosh konsullik veb-sahifasida ko’rsatilgan

Hujjatlarni pochta orqali yetkazib berish, shuningdek, barcha pochta xarajatlari uchun Bosh konsulxona javobgar emas!!!