Doimiy konsullik ro’yxati

O`zbekiston Respublikasining xorijdagi konsullik vakolatxonalarida doimiy konsullik ro`yxatiga O`zbekiston Respublikasidan xorijga doimiy yashashga chiqish varaqasi bilan yoki chet elda doimiy yashashga ruxsat beruvchi stikerlari bilan o`rnatilgan tartibda chiqib ketgan O`zbekiston Respublikasi fuqarolari va fuqaroligi bo`lmagan shaxslar olinadi. Shu qatorda, xorijda turib O`zbekiston Respublikasining xorijdagi diplomatik vakolatxonalari va konsullik muassasalari orqali xorijda yashashga ruxsat beruvchi hujjatlarni rasmiylashtirgan fuqrolar xam doimiy ro`yxatga olinadi.
1. O`zbekiston Respublikasi fuqarolari va fuqaroligi bo`lmagan shaxslarni doimiy konsullik ro`yxatiga olish uchun ro`yxatga olish kartasi to`ldiriladi (elektron anketa shaklida);
2. Elektron anketaga ariza beruvchining fotosurati yuklanadi;
3. Elektron tarzda to`ldirilgan anketaga quyidagi hujjatlarning skanerlangan nusxalari ilova qilinadi:
– pasport (biometrik, nobiometrik namunadagi), xorijga chiqish biometrik pasporti yoki harakatlanish hujjati;
– 16 yoshga to`lmagan bolalarning tug`ilganlik to`g`risidagi guvohnomasi (biometrik pasport, nobiometrik pasport, xorijga chiqish biometrik pasporti va harakatlanish hujjati bo`lmaganda);
– ota-onasidan birining nobiometrik pasportidagi bola haqidagi ma`lumotlar kiritilgan sahifasi nusxasi (bola haqidagi ma`lumotlar ota-onasidan birining nobiometrik pasportiga kiritilgan holda xorijga chiqqan bo`lsa);
– chiqib ketish varaqasining yoki ichki ishlar organlarining migratsiya va fuqarolikni rasmiylashtirish bo`linmalari tomonidan berilgan fuqaroning biometrik pasporti, nobiometrik pasporti yoki harakatlanish hujjatiga yopishtirilgan «Dоimiy yashashga ketishga ruxsat berildi» yozuvli stikerning nusxasi;
– O`zbekiston Respublikasi fuqarosi va fuqaroligi bo`lmagan shaxsning xorijiy davlat qonunchiligi talablariga muvofiq (viza, yashab turish hujjati, vaqtincha yashashga ruxsatnoma, pasportdagi tegishli qaydlar, ma`lumotnomalar va shu kabilar) bo`lib turishining qonuniyligini tasdiqlovchi hujjat;
4. Elektron anketa to`ldirilganidan va kerakli hujjatlar biriktirilganidan so`ng, kodni tasdiqlab “yuborish” belgisini bosish va kompyuter ekranida PDF shaklida elektron anketa paydo bo`lishi bilan uni bosmalash kerak.
5. 3 kun ichida ariza beruvchiga konsullik xizmatlari uchun to`lash zarurligi to`g`risida xabar keladi va to`lov amalga oshirilgandan so`ng doimiy ko`nsullik ro`yxatiga olinganlik to`g`risida xabarnoma yuboriladi va unda quyidagi ma`lumotlar mavjud buladi: shtrix-kod, ariza beruvchining to`liq ism-sharifi, konsullik ro`yxatining turi (doimiy), ro`yxatga olish raqami va sanasi, konsullik ro`yxatiga qabul qilgan xorijdagi muassasaning nomi.
6. Olingan xabarnomani bosmalab, pasportning ichida saqlash lozim.
7. Agar taqdim etilgan hujjatlar o`rnatilgan talablarga javob bermasa, ariza beruvchiga 3 kun ichida yetishmayotgan hujjatlarni yuborish yoki boshqa tegishli ma`lumot to`g`risida xabar keladi.

*** Doimiy konsullik ro’yxatiga turish uchun, albatta, xorijda doimiy yashash (PMJ) rasmiylashtirilgan bo’lishi lozim!!!