O’zbekistondan xujjatlarni talab qilib olish

Bosh konsulxona okrugi hududida (Germaniyaning federal yerlari – Hessen, Baden-Wyurtemberg, Shimoliy Reyn-Vestfaliya, Bavariya va Saarland hamda Lixtenshteyn Knyazligi) istiqomat qiluvchi O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslar, Bosh konsulxona orqali O‘zbekiston Respublikasi hududida joylashgan davlat muassasalari va tashkilotlar, fuqarolik holati dalolatnomalarini davlat ro‘yxatidan o‘tkazilganligi to‘g‘risidagi hujjatlar, ma’lumoti, ish staji va ariza beruvchilarning huquq va manfaatlariga daxldor boshqa hujjatlarni talab etish bo’yicha murojaat qilishlari mumkin.

Mehnat va pensiya daftarchalari, harbiy guvohnomalar, haydovchilik guvohnomalari va boshqalarning asl nusxalari talab etilmaydi va chet elga olib chiqilmaydi. Qayta nikoh to’g’risidagi guvohnomalar, agar nikoh buzilgan bo’lsa, shuningdek, vafot etgan shaxsning tug’ilganlik haqidagi guvohnomalari ham talab qilinishi mumkin emas. Voyaga etmaganlarning tug’ilganlik haqidagi guvohnomalari ularning qonuniy vakillari tomonidan so’raladi. O’lim to’g’risidagi guvohnoma marhumning qarindoshlari yoki yuridik shaxslar tomonidan rasmiy maqsadlarda talab qilinishi mumkin.

O‘zbekiston Respublikasidan hujjatlarni talab qilib olish uchun Bosh konsulxonaga 3 nusxada quyidagi hujjatlarni pochta orqali yuborish lozim:

1. O‘zbekiston Respublikasidan hujjatlarni talab qilib olish anketasi (ariza – so’rovnoma). Ariza bosma harflar bilan o’zbek yoki rus tillarida to’ldirilib bosmalanadi va unga sana hamda qol qo`yilib Bosh konsulxonaga yuboriladi. Har bir ustundagi tafsilotlar to’liq to’ldirilgan ariza haqiqiy deb hisoblanadi;
2. Pasportning barcha sahifalardan nusxa (bo’sh sahifalardan tashqari). A4 formatdagi varaqda 2 sahifani tushirish mumkin;
3. 3,5 x 4,5 sm o’lchamdagi fotosurat (3 dona);
4. Konsullik yig’imi to’langanligi to’g’risida kvitansiya:
a) O‘zbekiston Respublikasi fuqarolari uchun – 32 evro;
b) chet el fuqarolari uchun – 74 evro;
5. Qaytish manzili bo’lgan markalangan konvert.
MUHIM!

O‘zbekiston Respublikasi arxiv muassasalarida talab qilinadigan hujjatlar topilmasa, ariza beruvchiga so‘ralgan hujjatlar yoki ma’lumotlar etishmayotganligi to‘g‘risida xat yuboriladi. Bunday holda, konsullik yig’imi qaytarilmaydi.

Bank rekvizitlari Bosh konsulxona veb-saytida ko`rsatilgan.