Joriy yilning 2-3-may kunlari uchinchi Toshkent xalqaro investitsiya forumi (TXIF-III) bo’lib o’tadi, deb xabar qilmoqda “Dunyo” AA muxbiri.

Investitsiyalar, sanoat va savdo vazirligi ma’lumotiga ko’ra, TXIF – bu nafaqat O’zbekiston, balki butun mintaqa uchun muhim tadbir hisoblanadi. An’anaga muvofiq, uning dasturiga davlat rahbari darajasidagi yalpi majlis, turli masalalar muhokamasiga bag’ishlangan ekspertlarning 50 dan ortiq uchrashuvlari, jumladan panel munozaralari, davra suhbatlari va b2b muzokaralari kiritilgan.

Forumning har bir ishtirokchisi hamkorlar bilan manfaatlar kesishadigan nuqtalarini topishi, muayyan investitsiya loyihalarini o’rganishi, o’nlab yo’nalishlarda ro’y berayotgan so’nggi tendensiyalarni muhokama qilishi va istiqbolli takliflarni qabul qilishi mumkin bo’ladi.

Forum kun tartibida dunyodagi iqtisodiy turbulentlik fonida barqaror o’sish sur’atlarini namoyish etayotgan, bosqichma-bosqich Markaziy Osiyoning haqiqiy investitsiya markaziga aylanib borayotgan O’zbekistonning salohiyatini namoyon etish alohida o’rin tutadi. Yurtimizda amalga oshirilayotgan islohotlar, tadbirkorlik faoliyati uchun yaratilgan qulay sharoitlar, jumladan, salmoqli imtiyoz va preferensiyalar, investorlar huquqlarining kafolatlangan himoyasi investorlarning qiziqishini oshirmoqda.

Forum miqyosi va geografiyasi yildan-yilga oshib bormoqda:

– TXIF – 2022 (birinchi forum) forumiga 56 davlatdan 2 mingdan ortiq yirik investorlar va yuqori martabali mehmonlar tashrif buyurdi.

– TXIF – 2023 esa o’z maydonida 70 mamlakatdan 2500 ishtirokchini jamladi. Forum natijalarga ko’ra, 11 milliard dollarlik 164 hujjat imzolandi.

2024-yilda Toshkent sayyoramizning barcha qit’alaridan yana-da ko’proq mehmonlar – investorlar, rasmiylar va tahlilchilarni qabul qilishi kutilmoqda.

www.iift.uz sayti orqali 2024-yil 25-aprelgacha onlayn ro’yxatdan o’tish mumkin.