O‘zbekiston Tashqi ishlar vazirligi bugun Kobulda sodir etilgan terrorchilik harakati munosabati bilan bayonot berdi, deb xabar qilmoqda “Dunyo” AA muxbiri.
“Kobuldagi Rossiya Federatsiyasining konsullik bo‘limi yaqinida 2022 yil 5 sentyabr kuni sodir etilgan hamda diplomatik vakolatxona xodimlari va Afg‘oniston fuqarolarining qurbon bo‘lishiga olib kelgan terrorchilik harakatini qatʼiy qoralaymiz, – deyiladi hujjatda. – Ushbu g‘ayriinsoniy harakatning tashkilotchilari va ijrochilarini aniqlash uchun barcha zarur choralarni ko‘rishga chaqiramiz.
Halok bo‘lganlarining oila aʼzolari va yaqinlariga hamdardlik bildirib, jabrlanganlarning sog‘ayib ketishini tilaymiz”.