Buxorolik tadbirkorlar 70 million dollarlik mahsulotni eksportga rasmiylashtirdi

Buxorolik tadbirkorlar 70 million dollarlik mahsulotni eksportga rasmiylashtirdi

Pandemiya davrida Buxoro viloyatining eksport ko‘rsatkichlari barqarorligini hamda tashqi savdo yuklari harakatining uzluksizligini ta’minlash borasida viloyat bojxona boshqarmasi keng ko‘lamli ishlarni amalga oshirmoqda. Xususan, yil boshidan buyon Buxoroda tashqi iqtisodiy faoliyat ishtirokchilarining salkam 70 million AQSh dollarlik mahsulotlari eksportga rasmiylashtirildi, deb xabar bermoqda «Dunyo» AA muxbiri.

 

Jumladan, Buxoro tumanidagi yirik investitsiya loyihasi – «Buxara Varnet» mas’uliyati cheklangan jamiyati tomonidan barpo etilgan issiqxonalarni bunyod etishda Turkiyadan keltirilgan texnologiyalar uchun bojxona to‘lovlaridan 28 milliard 415 million so‘mlik imtiyozlar qo‘llanildi.

Yetishtirilgan sara pomidorlar shu yerning o‘zidan yuk avtotransport vositalariga ortiladi va bojxona xodimlari tomonidan rasmiylashtiriladi.

Viloyatning Vobkent tumanida joylashgan, tozalash vositalari ishlab chiqaruvchi yirik eksportyor korxona esa 2020 yil boshidan buyon 385,2 ming AQSh dollari qiymatidagi salkam 875 ming tonna kir yuvish vositalarini qo‘shni davlatlarga eksport qilishga muvaffaq bo‘ldi.

Yana bir xuddi shunday eksportyor korxonalardan biri Qorako‘l tumanidagi «REAL TEKS QORAKO’L» mas’uliyati cheklangan jamiyati o‘z faoliyatini to‘laqonli yo‘lga qo‘yishi uchun so‘nggi 4 yilda xorijdan keltirilgan texnologiyalariga bojxona to‘lovlaridan salkam 15 milliard so‘mlik imtiyozlar qo‘llanildi.

Mazkur korxona ham bojxonaga doir qulayliklar va yengilliklardan samarali foydalanib kelmoqda. Bu yerda tayyorlangan 2,6 million dollarlik 1 ming 233 tonna mahsulot Turkiya va Xitoyga eksport qilindi.