Bosh konsulxonaning konsullik okrugi hududida istiqomat qiluvchi O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslarning murojaatlariga ko‘ra, Bosh konsulxona O‘zbekiston Respublikasi hududida joylashgan davlat muassasalari va tashkilotlar, fuqarolik holati dalolatnomalarini davlat ro‘yxatidan o‘tkazilganligi to‘g‘risidagi hujjatlar, ma’lumoti, ish staji va ariza beruvchilarning huquq va manfaatlariga daxldor boshqa hujjatlarni talab etish bo’yicha murojaat qiladi.
Mehnat va pensiya daftarchalari, harbiy biletlar, haydovchilik guvohnomalari va shu kabi hujjatlarning asl nusxalari so‘rab olish, pochta orqali yuborish yoki chet elga olib chiqishga yo‘l qo‘yilmaydi. Shuningdek, nikoh bekor qilingan hollarda nikoh to‘g‘risidagi takroriy guvohnomalar, vafot etgan shaxslar haqidagi tug‘ilganlik to‘g‘risidagi guvohnomalar ham so‘ralmaydi. Nobalog‘at yoshidagi shaxslar tug‘ilganlik to‘g‘risidagi guvohnomalarini ularning qonuniy vakillari so‘rab olishlari mumkin. Vafot etgan shaxslar haqidagi guvohnomalarni esa ularning qarindoshlari yoki rasmiy maqsadlar uchun yuridik shaxslar so‘rab olishlari mumkin.
O‘zbekiston Respublikasidan hujjatlarni talab etish uchun Bosh konsulxonaga pochta orqali 1 nusxada quyidagi hujjatlar yuborilishi lozim:
1. Bosh konsulxona nomiga ariza (namunani chop etish);
2. So`rovnoma to‘ldirish lozim. Shundan so‘ng u chop etiladi, unga imzo va sana qo‘yiladi. Barcha ustunlarda ma’lumotlar to‘liq ko‘rsatilgan holda to‘ldirilgan anketa haqiqiy deb hisoblanadi;
3. Pasportning barcha sahifalaridan nusxasi (muhr va yozuv bo`lgan sahifalar);
4. Germaniyada yashashning qonuniyligini tasdiqlovchi hujjatning nusxasi (Dokument über die Rechtmäßigkeit des Aufenthalts);
5. Konsullik yig’imi to’langanligi to’g’risida kvitansiya;
- O‘zbekiston Respublikasi fuqarolari uchun – 30 yevro
- chet el fuqarolari uchun – 70 yevro
6. Tayyor hujjatlarni jo‘natish uchun manzili ko‘rsatilgan va tegishli marka yopishtirilgan konvert.
MUHIM!
Agar so‘ralayotgan hujjatlar O‘zbekiston Respublikasi arxiv muassasalarida topilmasa, ariza beruvchiga so‘ralgan hujjatlar yoki ma’lumotlar yo‘qligi to‘g‘risida xat yuboriladi. Bunday holda, konsullik yig’imi qaytarilmaydi.
Bosh konsulxonaning bank hisob-raqami:
Nassauische Sparkasse
Frankfurt am Main
Kontonummer 141055100
BLZ 51050015
IBAN DE08510500150141055100
BIC NASSDE55XXX
